വെങ്ങോല ഓണംവേലിയില്‍ മഞ്ഞപ്പിത്തം പടരുന്നു

പെരുമ്പാവൂര്‍: വെങ്ങോല പഞ്ചായത്തിലെ 17-ാം വാര്‍ഡില്‍ മഞ്ഞപ്പിത്തം പോലുള്ള മാരക രോഗങ്ങള്‍  പടരുന്നതായി പരാതി. 

വെങ്ങോല ഗ്രാമപഞ്ചായത്തിനേയും കിഴക്കമ്പലം ഗ്രാമപഞ്ചായത്തിനേയും ബന്ധിപ്പിക്കുന്ന മുക്കാറ തോട് മലിനമായതാണ് ഇതിനുകാരണമെന്നും പ്രദേശവാസികള്‍ പറയുന്നു. അറവുമാലിന്യങ്ങളും കക്കൂസ് മാലിന്യങ്ങളും രാത്രി കാലങ്ങളില്‍ ഈ തോട്ടിലാണ് കൊണ്ടുവന്ന് തള്ളുന്നത്. കൂടാതെ തൊട്ടടുത്ത് സ്ഥിതി ചെയ്യുന്ന ജയഭാരത് കോളജില്‍ നിന്നും തള്ളി വിടുന്ന മാലിന്യങ്ങളും  മുക്കാറ തോട്ടിലൂടെ ഒഴുകി ഓണംവേലിയിലുള്ള കുളത്തില്‍ വന്നുചേരുന്നു. ഈ കുളത്തിലെ വെള്ളത്തില്‍ കുളിക്കുന്നവര്‍ക്ക് ചൊറിച്ചിലും മറ്റും അനുഭവപ്പെടുന്നുണ്ട്. 

അടിയന്തിരമായി ഇക്കാര്യത്തില്‍ പഞ്ചായത്തിന്റെയും ആരോഗ്യ വകുപ്പിന്റെയും ശ്രദ്ധ ഉണ്ടാവണമെന്നും മാലിന്യങ്ങള്‍ തള്ളുന്നവരെ കണ്ടെത്തി ശിക്ഷണ നടപടികള്‍ സ്വീകരിക്കണമെന്നും ദളിത് ഫെഡറേഷന്‍ ജില്ലാ സെക്രട്ടറി കെ.കെ ഗോപി ആവശ്യപ്പെട്ടു. 

മംഗളം 25.05.2013